Məktəbdənkənar fəaliyyətlər, adından da başa düşüldüyü kimi məktəb proqramından kənarda qalan fəaliyyətlərdir. Məcburi deyil, şagird və tələbənin maraqlarından asılı olaraq könüllüdür. Hobbilər, idman, könüllülük, sosial innovasiya layihələri və. s məktəbədnkənar fəaliyyət hesab olunur. Hansı məktəbdənkənar fəaliyyətin şagirdin maraqlarına uyğun olduğunu müəyyənləşdirmək, həm də bunların nüfuzlu universitetlərə qəbul proosesinə köməyi yaxşı qiymətləndirilməlidir. Bu fəaliyyətlər şagird və tələbə profilinin detallarını yaxşı əks etdirir, onların maraq dairələrini, zamanı necə idarə etmələrini, liderlik bacarıqlarını ortaya qoyur.

Nəzərə alın ki, dünyanın nüfuzlu universitetlərində oxumaq istəyən təkcə siz deyilsiniz. Sizin kimi müxtəlif ölkələrdən şagirdlər bu universitetlərin tələbəsi olmaq üçün yorulmadan çalışırlar. Üstəlik, dərs qiymətləri yüksək, 1500-dən çox SAT balı, 100-dən çox TOEFL nəticəsi olan tələbə namizədlərinin sayı dünya miqyasında hər il artır. Nüfuzlu universitetlər öz tələbələrini belə namizədlər arasından seçir, ancaq bəzi ailələr və tələbələr ən yüksək imtahan nəticələrinin bu universitetlərdə təhsil almaq üçün kifayət edəcəyini düşünərkən səhvə yol verirlər.  Mükəmməl dərs qiymətləri və imtahan nəticələrinə sahib minlərlə rəqibin arasından seçilmək üçün məktəbdənkənar akademik və innovativ uğurlara ehtiyac var. Buna görə də hər tələbə namizədi öz CV-ni universitetlərin gözləntisinə uyğun məktəbdənkənar fəaliyyətlərlə zənginləşdirməlidir.

Məktəbdənkənar fəaliyyətlərin fərdi qaydada çoxlu faydası olsa da, önəmli nəticlərindən biri də nüfuzlu universitetlərin qəbul komissiyasının nəzərində yaratdığı tələbə təəssüratıdır. Bu fəaliyyətlər tələbə həyatınızı social olaraq necə yaşayacağınızı, komanda işinə uyğunlaşma bacarığınızı, liderlik qabiliyyətinizi, kreativ düşünməyinizi, aldığınız təhsili gələcək həyatınızda necə dəyərləndirəcəyinizi də göstərir.

Məktəbdənkənar fəaliyyətlər həm də şagird və tələbələrin özlərini kəşfetmələrinə və maraq dairələrini genişlətmələrinə kömək edir ki, bu da onların təhsil hədəflərinə daha güclü hazırlanmalarına dəstək verir.