Motivasiya məktubu tələbənin universitet və ixtisas seçiminin səbəblərini, karyera məqsədlərini və akademik maraqlarını göstərən mətndir. Bu məktub tələbənin şəxsi və akademik maraqlarını, universitetə verə biləcəyi töhfələri ortaya qoyaraq onun xarakteri və şəxsiyyəti haqqında təəssürat formalaşdırır. Motivasiya məktubu bəzən tələbələrə önəmsiz sənəd kimi görünsə də, təcrübədə akademik göstəriciləri yüksək olub motivasiya məktubu zəif olan namizədlərin arzuladıqları universitetlərə qəbul olunmaması hallarına da rast gəlinir. Universitetlərin qəbul komissiyaları bu təəssürata əsaslanaraq tələbənin müraciətini qiymətləndirərək qəbul və ya rədd cəvabını konkretləşdirir.

Tövsiyə məktubu, adətən tələbənin müəllimləri və ya mentorları tərəfindən yazılan, tələbənin xarakterini, bacarıqlarını və nailiyyətlərini əks etdirən şəxsi sənəddir. Bu məktub tələbənin akademik və sosial səriştələrini vurğulamaqla universitet müraciətinə obyektiv perspektiv təqdim edir. Tövsiyə məktubu tələbənin akademik performansını, liderlik qabiliyyətini, xarakterini və xüsusi layihələrə verdiyi töhfələri vurğulamaqla onun nəzərdə tutulan proqrama və ya universitetə uyğunluğunu dəstəkləyir. Universitetlər bu məktubları dəyərləndirərək tələbənin potensialını daha dərindən anlayır və dərslərinə dəyər qatacaq namizədləri seçirlər.

Esselər tələbənin şəxsi, akademik bacarıqlarını və peşəkarlığını dərindən ifadə etmək imkanı verir. Bu mətnlər tələbənin xarakterini, təcrübələrini və məqsədlərini başa düşmək üçün nəzərdə tutulub. Tələbəyə öz düşüncə tərzini, yazı bacarıqlarını və tənqidi düşünmə qabiliyyətini nümayiş etdirməyə imkan verir. Esseler tələbənin çətinliklərin öhdəsindən gəlmək bacarığı, liderlik təcrübəsi, şəxsi inkişaf və cəmiyyətə töhfələr kimi mühüm xüsusiyyətlərini əks etdirir. Universitetlərin qəbul komissiyaları tələbənin özünü ifadə etmə qabiliyyətini, məqsədlərinə bağlılığını, fərqləndirici keyfiyyətlərini esselərə baxaraq qiymətləndirirlər.